t Evengelie volgens Matteüs 04
01Dou wer Jezus deur Gaist noar woestijn brocht om deur duvel oetdoagd te worden.
02Noadat e vatteg doagen en vatteg nachten vast haar, kreeg e op t leste honger.
03Op dat ogenblik kwam oetdoager op hom tou. Dij zee: "As ie God zien Zeun binnen, zeg den ais tegen dij vlinten dat zai brood worden mouten."
04Mor Jezus antwoordde: "Der staait schreven: 'n Mensk zel nait enkeld van brood leven: hai leeft van elk woord dat oet mond van God komt.'"
05Dou nam duvel hom mit noar haailege stad tou en zette hom op raand van tempeldak.
06"As ie God zien Zeun binnen," zee e tegen hom, "spring hier den es òf. Der staait ja schreven: 'Hai zel zien engels veur joe bestellen en op heur handen zellen ze joe droagen, dat ie joen vout nait aan n vlint steuten zellen.'"
07Dou zee Jezus tegen hom: "Der staait ook schreven: 'Ie zellen de Heer, joen God, nait oetdoagen.'"
08Duvel nam hom nog ais mit noar n haile hoge baarg tou. Hai luit hom ale keunenkrieken van wereld zain mit aal heur pronk en pracht.
09"Dat zel k joe altmoal geven," zee e, "as ie veur mie op knijen valen en mie aanbeden doun."
10 Dou zee Jezus tegen hom: "Goa vot, soatan! Der staait ja schreven: 'Ie zellen de Heer, joen God, aanbeden en hom allain dainen.'"
11 Dou luit duvel hom mit vree en engels kwammen om hom te bedainen.
12 Dou Jezus vernam dat Johannes overleverd was, week e noar Galilea oet.
13 Hai ging nait in Nazaret wonen, mor vestegde zok in Kafarnaüm aan t meer, in kontrainen van Zebulon en Naftali.
14 Zo gebeurde wat deur profeet Jesaja zegd is:
15 "Laand van Zebulon, laand van Naftali, laand aan weg noar zee aan overkaant van Jordaan, Galilea, laand van haaidens:
16 t volk dat in t duustern zit, het n glìn licht zain, en veur wèl in t laand en in schaar van dood zatten, veur heur is n licht opgoan."
17 Van dou òf aan begunde Jezus te verkundegen: "Begun n nij levent. t Hemels keunenkriek is ja stoef bie."
18 Op n keer, dou hai bie t meer van Galilea langs laip, zag e twij bruiers dij heur net in t meer gooiden: Simon (doar ze ook Petrus tegen zeden) en Andreas. Viskerlu wazzen t.
19 "Tou, achter mie aan," zee e tegen heur, "den zel ik van joe viskerlu moaken dij mensken vangen."
20 Votdoalek luiten ze heur netten liggen en gingen mit hom mit.
21 n Èndje wieder zag e nog twij bruiers, Jakobus, Zebedeüs zien zeun, en zien bruier Johannes. Zai wazzen in boot mit heur voader Zebedeüs heur netten aan t noakieken. Jezus raip heur.
22 Zai luiten votdoalek schip en voader achter en gingen achter hom aan.
23 Jezus trok hail Galilea deur. Hai gaf onderricht in heur sinagoges, verkundegde bliede bosschop van t keunenkriek en muik aal heur zaiktes en kwoalen beter.
24 Hai wer alderdeegs bekend in hail Syrië. Ze brochten ale zaiken bie hom. Aan wat veur kwoalen en ploagen ze ook leden, kwam der nait op aan: alderdeegs dij bezeten wazzen, mensken dij aan touvalen leden en lu dij verlamd wazzen, hai muik ze altmoal beter.
25 n Haile tjucht mensken ging achter hom aan; ze kwammen oet Galilea, kontrainen van Dekapolis, Jeruzalem, Judea en overkaant van Jordaan.
|
